Hallo, Hey, Grüaß di mir ham uns jetzt aber scho lang nimma gseng.
Geht’s dir gut oder is dawei wos Bsonderes gscheng.
Ausschaugn tuast gut, na älter san mia holt worn.
Mia san holt doch a bisserl zu früh geborn.
Schee, dass ma wieder alle zamma kemma,
Des Fest des muaß sei, des lasst ma uns net nehma.
Es san doch wieder do an haufa Leit,
I sich scho wie de Vorstandschaft des bsonders guat freid.
So solls a sei, des hot doch vui Arbat gmacht.
bis des ganze Gspui do zamma ham bracht.
De Vorbereitung, de Zimmer de Musik
und ollas was dazu g´hört, des is scho a Lob für die Oberen wert.
Touren für unta togs ham se sich a noch ausdenkt.
Do ham se sich ganz sche ausm Fensta nausglehnt
De Oana san aufn Unnütz, des warn de Guatn,
de Andern san mit´m Schiff gfahrn und san ganga a leichtere Routn.
Olle habn sich abends in Schale gschmissn,
a i hob mei Lederhosen aus Schrank rausgrissn.
Sie schaugt guat aus, aber sie zwickt hint und vorn,
do ware doch glei liaba als Madl geborn.
De ham des schee, de schliaffa ins Dirndl nei,
Es muaß net immer glei a Originaltracht sei.
Jetz aber dean mia was Essen, denn nacher geht’s o,
Der Vorstand wui sei Red haltn, er is a scho doa.
Natürlich wia imma sitzn de Cliquen beinand,
am liabstn namadn se sich no glei bei der Hand.
Des ganze Jahr über, san sie sowieso,
Oana fürn Andern immer glei doa.
Jetzt, ja jetzt wird´s feierlich de Jubilare kommen raus,
doch statt einen großen Blumenstrauß,
kriang sie nur oa Blemarl, a Edelweiß,
für die Treue zum Verein als sichtbaren Beweis.
25, 40 und a 50jährige warn gmeldt,
leider ham da doch einige gfehlt.
Aber für die, die doa warn wars a schöne Gschicht,
sie hab´n se gfreit und glacht üba des ganze Gsicht.
Dann war da auch no Tanz, doch des Ratschn ging vor,
der Vorstand mit seiner Frau de tanzten alloa.
Späta hoat se ollas dann durchananda gmischt,
schee wars, mir ham wieder Erinnerungen aufgfrischt.
Olle 2 Johr richten mir so eine Feier aus,
da gebn mia an de Jubilare ihr Edelweiß naus.
Dass mi wieder mitnehmts, deats ma des Versprechn gebn,
dann woas es quieß, dass i dann no dua leben.
Ernst Jaud, 16.10.2014
